மென்பொருள் செய்திகள் மூன்று

கூகுள் வாங்கிய ஜீமெயில்!

எல்லா நாடுகளிலும் ஜீமெயில் முகவரி @gmail.com-னுதான் முடியும்.

ஆனால் இதுவரை ஜெர்மனியில் மட்டும் @googlemail.com-னுதான் இருந்தது. ஏன்னா G எழுத்தை தன் பேரில் முதல் எழுத்தாக வைத்திருந்த ஒருத்தன் அந்த பேரை ஜெர்மனியில் டிரேட்மார்க் செய்துவைத்திருந்தான்.

கூகுளும் எவ்வளவோ போராடிப் பார்த்தது. போன வாரம்தான் ஒரு வழியா அந்த பேரை வாங்கியது. பேரை விட்டுக்கொடுத்தவன் சும்மாவா கொடுத்திருப்பான்? இதுதான் சமயம்னு கன்னாபின்னான்னு மீட்டரை ஏத்தி இருக்கமாட்டானா?

இதேமாதிரி இங்கிலாந்திலேயும் இதே பேருக்காக கூகுள் 2010-ல் செட்டில்மென்ட் செய்தது.

சுதந்திர மைக்ரோசாஃப்ட்?!

"மைக்ரோசாப்ட் ஓப்பன் டெக்னாலஜிஸ் இன்க்" என்று ஒரு புதிய துணை நிறுவனத்தை (subsidiary) மைக்ரோசாப்ட் நிறுவனம் ஆரம்பித்து இருக்கிறது.

அது சில பல காரணங்களுக்காக கட்டற்ற மென்பொருள் சமூகத்துடன் சேர்ந்து செயல்பட விரும்புகிறது.

கட்டற்ற மென்பொருட்களுடன், தன் தனியுரிமை மென்பொருட்கள் சேர்ந்து சரியாக இயங்கும் வகையில் இந்த புதிய நிறுவனம் வழியாக மைக்ரோசாஃப்ட் முயற்சிகளை மேற்கொள்ளும்.

அப்படியே எம்.எஸ் ஆபீசின் ஃபைல் பார்மேட்டை கட்டற்ற மென்பொருளாக்கிவிட்டால் ஓப்பன்/லிபர்ஆபீஸை இன்னும் பலர் பயன்படுத்த முன்வருவார்கள். ஃபைல் பார்மேட் பிரச்சனையாலேயே நிறையபேர் ஓப்பன்/லிபர் ஆபீஸ் பயன்படுத்த தயங்குகிறார்கள்.

இப்போதைக்கு கிளவுட் கம்ப்யூட்டிங்தான் ஹாட் டாபிக்.

கிளவுட் ஆபரேடிங் சிஸ்டம் "ஓப்பன்ஸ்டாக்" ஒரு கட்டற்ற மென்பொருள். இதை பைத்தான் மொழியைப் பயன்படுத்தி உருவாக்கியிருக்கிறார்கள்.

லினக்சுக்கு லினக்ஸ் பெளன்டேஷன் இருக்கிறது. அதைப்போல ஓப்பன்ஸ்டாக்கும் ஒரு பெளன்டேஷன் ஆரம்பிக்க ரெட்ஹேட், ஐ.பி.எம், யாஹூ!, டெல் உட்பட 19 கம்பெனிகள்** ஒருசேர முன்வந்து இருக்கிறார்கள்.

இன்டெர்நெட் வந்து நம் வாழ்க்கை முறையையே மாற்றின மாதிரி இந்த கிளவுட் கம்ப்யூட்டிங்கும் ஒரு பெரிய சக்தியாக உருவெடுக்கும் என்று எதிர்பார்க்கிறார்கள்.

ஓப்பன்ஸ்டாக் நிறுவனம் ஏப்ரல் 2012-ல் தங்களது 5வது பதிப்பை வெளியிட்டார்கள். அதற்கு செல்லப்பெயர் எஸ்ஸெக்ஸ்.

உபுன்டு மாதிரியே ஓப்பன்ஸ்டாக் பதிப்புகளுக்கும் ஏ, பி, சி, டின்னு வரிசையா பேர் வைத்து வருகிறார்கள்.

இதன் முதல் 4 பதிப்புகள்.

1. ஆஸ்டின்
2. பெக்ஸர்
3. காக்டஸ்
4. டையப்லோ.

ஓப்பன்ஸ்டாக்கின் அடுத்த ஆறாவது பதிப்புக்கு ஃபோல்ஸோம் என்று பெயர் வைத்து இருக்கிறார்கள்.

இந்த கிளவுட் கம்ப்யூட்டிங்குக்கு சரியான தமிழ் வார்த்தை கண்டுபிடிங்கப்பா.

**
பிளாட்டினம் உறுப்பினர்கள்: ஏ.டி&டி, கனோனிகல், ஹெச்.பி, ஐ.பி.எம், நெபுலா, ராக்ஸ்பேஸ், ரெட்ஹேட், சுசி

தங்க உறுப்பினர்கள் : சிஸ்கோ, க்ளியர்பாத், க்ளவுட் ஸ்கேலிங், டெல், ட்ரீம்ஹோஸ்ட், ஐ.டி.ஆர்.ஐ, மிரான்டிஸ், மார்ப்லேப்ஸ், நெட்அப், பிஸ்டன் க்ளவுட் கம்ப்யூட்டிங், யாஹூ!